Hótiyan: Octhreliat mazé asédé manuc okkololla

Ofarecón Sóberin Boordhars hoodé íán ki?

Ofarecón Sóberin Bordhars hoodé íán óilde bekanuné doijja baai manúc far goron bon gorioré Octhreliar boordhar hefaazot goríbolla Octhreliar córhare militari dioré salade uggwa ofarecón.

Bekanune manúc far goroonor kriminal ham bon goroon ar mosiyotot foijjédé manucé zan átolloi buçot gorí Octhreliat aito saade úunore aito nodibollá Octhrelia fikirot asé.

Bekanuné doijja baai Octhreliat manúc loi ahéri buth aiccédé ia tin bosór órgai. Taar baade looti bekanuné Octhreliat aito saiyédé buth bekkinore dórioré zettu aicce éçe wapes diya giye.

Octhreliar boordhar hefaazotor kanun ki?

Doijja baai manuc far gorón bon goribollá, doijjammazé manuc no moribollá ar Octhreliar boordhar hefaazot goribollá Octhreliae doromoró entezaam goijjé.

Buçot gorí bíca sara Octhreliat aitó saibodé manuc únore ze decóttu aibó é decót wapes diya zaibo, Octhreliammaze tai zaiyói nofaribo. Tuañr egana-guctí fuaiñjja-aiñjja kiyó bíca sará buçot uçílé ítara Ochtreliat góli nofaribó.

Kanun ián ki ókkolollá eddoillá né?

Sóhi. Buçot gorí bíca sara Octhreliat ze aitó saibó taré ze decóttu aibó é decót wapes diya zaibo. Kanun ian ókkolollá eddoillá: fémili, gura fuain, síra gura fuain, fonna zanede no zanede manuc – kiyólla honoó forók kanun nai.

Dalalor hotá nodóijjó, ítara misá hotá hoode...

Ochtreliat aaiyoré táibolla fána oi giyóide manucoré dalal okkole misá hotá hoode ían aañra zani. Manuc far gorede dalal okkol óilde hoduun kriminal zuune maincór zanor uore azab ané ar ítarar tiña-foisa loi felay.

Dalal ókkole tuañr fuaiñjja-aaiñjja egana-gucthíre hoibodé Octhreliat zoon ebbe ahsan, ar kanun iya norom oi zargoi. Itararé hoibadé misá hotá íin nodóribolla! Sohi bísar habos sara Octhreliat aaiyore tái nofaribá. Octhreliar córhare doro kanun hono bodolaiyede eeiñlla nai ar samnottuo nobodolaibo.

Dalal ókkole hoibodé ítaralla dusará kanun asé, ar noóile hoibodé kanun hára bodoli zaiboi. Kanun tuañr fuaiñjja-aaiñjja egana-gucthílla eddoilla, ítaralla hono duasará nai. Ítararé zaito nodiyó!

Kanunor baare buth loi Octhreliat aitó saibodé ítara honó Octhreliat tái nofaribó. Tuañr fuaiñjja-aaiñjja egana-gucthíre hoode tiña-foisa borbad dibar agé fíri báfibolla.

Egana-gucthíye Octhreliat aaiyoré tái faribodé keén gori?

Octhreliat aaiyoré táito saadde manuc, ar nooile Octhreliat aaiyoré táito sadde éeiñlla fuaiñjja-aaiñjja asedé manucóttu monot rahá foribodé Octhreliat aibolla sóhi kanun asé. Kanunor baare aitó sailé tuiñ honoódino Octhreliat tái nofaribá.

Octhreliar Córharor Rifuzi ar Hiumenitherian Furugramor bútore The Department of Immigration and Border Protection ottu baarkule loi rakíbár ekkada furugram asé. Ei furugramor ham óilde becábecí mosiyotot fori ar honó foñt nodehí manuc zuuné Ochtheliattu modot mager uunor baabote.

Baarkule loi rakíbár furugram noháçedde uune zodicé ham goríbolla Octhreliat aitó saadde óile ítarattu hamor bícalla efelai gora foribo.

Kanun mozin aibar baabote aró becí gori zanibólla Department of Immigration and Border Protection or websait: http://www.border.gov.au/